Un de ca cuatro asturianos alcontrábase’n riesgu de probitú ya esclusión social l’añu pasáu y dende entos la situación vien apiorando progresivamente de manera bultable
L’informe “L’Estáu de la probitú n’España y Asturies” ellaboráu pola Rede Europea de Llucha contre la Probitú y Esclusión Social (EAPN) del añu 2.022 revela qu’Asturies ye’l territoriu más probe del norte peninsular, con 254.000 persones, más d’una cuarta parte de la población, afeutada. La situación ye pior pente les muyeres y llaceriosa pente los menores de 18 años.
La fienda de xéneru duplicóse nos caberos cincu años, siendo asina que mientres carecen probitú un 22,2% de los homes, en muyeres esa cifra asciende al 28,1 %, siendo los llares más llamativamente probes aquellos nos que conviven menores con un solu adultu, muyer, al cargu.
Pero lo vraeramente urxente ye que’l 40,1 por cientu de los menores asturianos nun tienen la capacidá económica mínima pa llevar una vida digna, el pior valor de la serie hestórica. Estudiar ya nun ye una salida segura pa salir de ser probe y tener emplegu, dao la so precariedá, tampocu. Esta situación ta afeutando a la salú mental de la mocedá, con un incrementu de los problemes por ansiedá y/o depresión pente menores de 18 años de cuasique un 50%.
Nun hai argumentos oxetivos que xustifiquen estes cifres. Asina, en territorios mui averaos y asemeyaos en recursos a Asturies alcontramos tases bien estremaes, con namás un 4,8% de mocedá en riesgu nel Pais Vascu, un 19% en Cantabria ya un 25% en Galicia. Poro, la única esplicación pa los esmolecedores datos asturianos alcuéntrase na deficiente xestión que d’esos recursos vien faciéndose dende los socesivos gobiernos asturianos.
Redaición InfoAsturies
This work is licensed under a Creative Commons Attribution 4.0 International License.
