Bonos díes, bona xente.
Alborecemos con vientu ábrigu y nel cielu tenemos nubes ya claros ya con unes temperatures que tan alrodiu de los 16ºC, rexistrándose nel puertu Payares 8,5ºC
Güei vamos tener intervalos nubosos entemecios ente dellos claros o abancios, tando la nubosidá más abondosa nel estremu surocidental y cordelera, asína y too nes hores centrales del día el pasu d’un frente poco activu pue dexanos dalguna precipitación feble. Les temperatures en moderáu ascensu y l’aire ábrigu pue soplar con raches fuertes en zones altes ya en puntos del llitoral.
Nel prósimu riscar va cruzanos, d’oeste a este, otru frente atlánticu pero esti muncho más activu que mos va dexar precipitaciones moderaes puntualmente fuertes. Durante’l día seguirán les precipitaciones pero sedrán intermitentes y disperses con apertura de claros o abancios durante la tarde. Les temperatures en descensu y l’aire gallegu pue soplar con fuercia na cordelera y puntos del llitoral.
El vienres lo más destacáu sedrá l’aire gallegu que va soplar con raches mui fuertes, arrastrando dalgo de nubosidá que mos apurrirá precipitaciones febles ya disperses con unes temperatures que siguen baxando ya cola sensación térmica en descensu por mor del vientu.
Que paséis un bon miércoles collacies ya collacios.
This work is licensed under a Creative Commons Attribution 4.0 International License.
