El XI Congresu Internacional d’ordenación del Territoriu preslló dando puxu a una Planificación más humana

29 Ochobre, 2023

El XI Congresu Internacional d’Ordenación del Territoriu cellebráu en Xixón preslló, énte 200 asistentes, tres trés intenses xornaes de ponencies nes que se punxo l’enfotu na importancia d’una Ordenación Territorial que tenga a les persones nel centru de la toma de decisiones
La gran xunta de los profesionales de la Ordenación del Territoriu, que se cellebró esta selmana en Llaboral Ciudá de la Cultura, entamada pola Asociación Interprofesional d’Ordenación del Territoriu (FUNDICOT) y pol Principáu d’Asturies, al traviés de la Conseyería de Mediu Rural y Cohesión Territorial, aconceyó a asistentes llegaos dende tolos puntos del estáu, países europeos y suramericanos, como Brasil y Colombia.
La temática d’esta edición, sol títulu “Transición Territorial”, encara les Transiciones Ecolóxica, Enerxética, Dixital, Demográfica, Alimentaria, Económica, Social y Cultural. L’estensu programa desendolcóse énte más de 200 asistentes, que destaquen la calidá ya interés de les ponencies, pola relevancia y vixencia que tienen les temes trataes.
Nesti sentíu, Sonia Ponte Landázuri, anguaño en Sogepsa ya integrante del Comité Organizador
del XI CIOT, aporfió’n que “l’urbanismu ye más que términos inintelixibles, ye daqué qu’afecta a la vida de les persones y tenemos de volver a la esencia de la ordenación del territoriu y la planificación”. Por
ello, aportuna na necesidá de “averar a les persones l’interés y la conocencia sobro l’urbanismu y
l’ordenación del territoriu, que va más allá de conceutos complexos y artículos de llei, impactando más
nel día ente día de lo que pensamos”. Pa ilustralo, indica que “l’urbanismu ye tener solombra nuna ciudá, que una ciudá seya accesible o que tenga una bona movilidá”.
La implicación de la comunidá educativo y académico asturiana estiéndese tamién a la participación
como collaboradores científicos de la Cátedra Concepción Arenal d’Axenda 2030 de la Universidá d’Uviéu, el Departamentu de Xeografía de la Universidá d’Uviéu, l’Institutu de Recursos Naturales
y Ordenación del Territoriu (INDUROT) de la Universidá d’Uviéu y CeCodet el Centru de Cooperación
y Desenvolvimientu Territorial de la Universidá d’Uviéu.
El XI CIOT cerró les sos sesiones col actu de clausura nel que participaron representantes de les
entidaes organizadores y patrocinadores: Joaquín Farinós Dasí (Presidente de FUNDICOT), Ignacio Ruiz Latierro (Director Xeneral d’Ordenación del Territoriu del Principáu d’Asturies), Ánxeles
Vázquez Mejuto (Vicepresidenta Segunda y Conseyera de Mediu Ambiente, Territoriu y Vivienda de la Xunta de Galicia), Jose Antonio Marcén Zunzarren (Director Xeneral d’Ordenación del Territoriu del Gobiernu Foral de Navarra), Saturnino Corcheru Pérez (Director Xeneral d’Urbanismu, Ordenación
del Territoriu y Axenda Urbana de la Xunta d’Estremadura) y María Pardo Álvarez (Directora Xeneral
de Vivienda, Arquitectura y Urbanismu de la Xunta de Castiella y Llión).
Nesi intre remataron les ponencies, pero non l’actividá. Mientres la tarde, los asistentes realizaron una visita guiada a la esposición Motores del Clima” en Llaboral Centru d’Arte y Creación Industrial, ente qu’ayeri sábadu fexeron una salida de campu pa visitar el conceyu de Grau y la villa d’Infiestu,
onde conocieron el proyectu de La Benéfica de Piloña.