Bonos díes, bona xente.

Alborecemos con escasa nubosidá, sicasí na fastera más surocidental d’Asturies y cordelera tienen el cielu nuboso y cae dalguna gotera con unes temperatures que tan alrodiu de los 13ºC, rexistrándose nel puirtu Payares 6,7ºC.

Güei vamos tener una mañana mui seliquina con escasa nubosidá na mayor parte d’Asturies menos na fastera ocidental y cordelera onde tendrán tol día el cielu nuboso con precipitaciones febles ya intermitentes. Yá pela tarde van a estendese les nubes al restu d’Asturies pero con mui poques posibilidaes de lluvia. Les temperatures en descensu y l’aire amenorgando anque nes zones más favoretibles seguirá ruxiendo.

Nesti riscar llegarán les lluvies a la mayor parte d’Asturies en forma de xarabatos intermitentes y dispersos, amás vendrán acompangaos d’un descensu de les temperatures que fadrá que nive nes cumes más altes de la cordelera. Durante la mañana abriránse grandes claros para aumentar la nubosidá de nuevu pela tarde pero yá sin precipitaciones y lo más destacáu sedrá l’aire gallegu que pue soplar con raches mui fuertes en zones altes de montaña ya en puntos del llitoral.

El martes vamos tener un día mui seliquino ente nubes ya claros o abancios con un ascensu de les temperatures másimes, mentantu les mínimes descenderán bultablemente.

A partir del miércoles pela tarde vamos tener dellos temporalones atlánticos con sucesivos frentes, vientu con raches mui fuertes que puen algamar los 120km/h en zones altes de la cordelera ya en puntos del llitoral que mos dexará un fuerte temporal tamién na mar ya un descensu de les temperatures, sobre too de cara al xueves ya vienres onde la nieve pue surdir a partir de los 1200m., pero esto yá lu diremos viendo con más detalle.

Que paséis un bon domingu collacies ya collacios.