Ministeriu y CCAA alcuerden entamar los trámites para reconocer toles edificaciones ellevaes de conservación d’alimentu como padremuñu inmaterial
El Conseyu del Padremuñu Históricu, máximu órganu de coordinación en materia padremuñal ente’l Ministeriu de Cultura y les comunidaes autónomes, tres recien aconceyar en Bilbao alcordó empecipiar los trámites pa declarar les tenaes elevaes tradicionales como manifestación representativa del padremuñu cultural inmaterial estatal. Por supuestu, nesi ámbetu les principales edificaciones son asturianes, horros, cabazos y paneres, relevantes non solo polo abondoses y específiques, sinón pol so estáu de conservación y usu en tiempos recientes.
La propuesta pon en valir tamién los aspeutos inmateriales venceyaos a los horros, los sos usos y los conocimientos necesarios pa la so costrución, caltenimientu y reparación utilizando pa ellos siempres materiales propios del entornu.
Esta propuesta ye perinteresante p’Asturies porque ello obligaría al principado a crear el tantes vegaes postergáu rexistru d’horros y paneres y entamar l’esperáu reglamentu específicu pa la so proteición, cola creación d’una comisión dientro l’Alministración de Cultura, Urbanismu y Mediu Rural que tutelare les midíes de proteición y destinare recursos pa la proteición, restauración y estudiu de los horros asturianos.
Susana Sela
This work is licensed under a Creative Commons Attribution 4.0 International License.
