El Principáu vien d’espublizar nel BOPA el tan anunciáu Plan añal pal  2024 de prevención, xixilancia y estinción de quemes. Un Plan que  dexa ablucaos a los ecoloxistes “poles sos contradicciones, vacuidad y absoluta insuficiencia nes midíes qu’adopta pa lluchar contra les quemes”

El plan entama analizando les estadístiques de les causes de quemes investigaes poles BRIPAS, el SEPRONA y la Fiscalía, onde se constata espresamente que: “Les quemes tán acomuñaes na so mayoría de los casos a l’actividá humana. Predominando’l incendiarismu y la neglixencia nel usu del fueu como ferramienta agrícola, práctica bien enraigonada na cultura asturiana. Siendo la rexeneración de camperes por aciu práctiques ganaderes la causa de mayor superficie quemada intencionadamente. Destacando qu’el 67,51% de les quemes investigaes fueron provocaos por pastores y ganaderos pa refaer y favorecer la nacencia de la campera”.

Anunciase darréu la modificación de la Llei de Montes, afitando llendes pal usu del fueu, pero ensin facer referencia dala a la recuperación de los acutaos al pastoreu, suprimíos en 2017 y que son una ferramienta fundamental p’actuar sobro’l raigañu del problema: la xeneración de camperes. 

Pa los ecoloxistes, nun llogrando naide beneficiu de quemar un monte, nun hai quema.  Asturies ye l’únicu territoriu l’estáu  y l’única rexón de tola Xunión Europea na que nun s’acuten al pastoréu les zones esfarrapaes por quemes forestales. Pa los ganaeros estes afirmaciones son tendencioses y desinformaes, pues ellos, aporfien, son los principales afeutaos pola proximidá de les quemes. D’ehí les ayudes agroambientales de la PAC, que perciben les zones quemaes pa contribuyir a la implantación y desendolcu de sistemes agrícoles y ganaderos compatibles cola protección y meyora del mediu ambiente, el paisaxe, los recursos naturales, el suelu y la biodiversidá, que según los ecoloxistes, nun se tan utilizando nesi sen, tornando al etenru enfrentamientu pente moraores de la zona rural y ecoloxistes, dos coleutivos enfotaos na defensa del mediu rural pero con visiones encontraes.

Alberto Rodríguez

This work is licensed under a Creative Commons Attribution 4.0 International License.