La xente espulsao pol pueblu de Morea d’Ayer tres tiempu aguantando el so comportamientu incívicu veníen de Madrid, non de África, comu se quiso facer creyer
Los fechos tuvieron llugar na nueche de la Folixa de la Montera Picona, cuando los vecinos de Morea d’Ayer decidieron acomuñar pa echar del so pueblu a unos vecinos indeseyaos, un garrapiellu de rapazos d’alrodiu los venti años a los qu’acusen de francer toles llendes de convivencia: robos, insultos, agresiones… fartucos de la inutilidá de poner denuncies y de tener miéu fasta de salir a la cai o dir en tren -RENFE tomare ya midies contra les sos agresiones, aumentando la xixilancia- los vecinos xuntaron fuercies y forciaronlos a abandonar el pueblu, d’aú colaron escoltaos por policies pa torgar males mayores.
Fasta ehí, l’actuación exemplar d’un pueblu que foi quien a xunise pa defendese del abusu. Faltó tiempu pa que se tomare nota de que yeren “de fuera” y se diere a entender, tanto en redes de la Guardia Civil y Policia -onde ya esborriaron el post- comu en dellos medios, que se trataba d’inmigrantes illegales, magrebies y Menas, pa más señes. La realidá yera bien otra, los mozos son foriatos, si, de Madrid.
This work is licensed under a Creative Commons Attribution 4.0 International License.
