Bonos díes, bona xente.

Alborecemos col cielu nuboso ya con unes temperatures que tan alrodiu de los 10ºC, rexistrándose nel puertu Payares 1,6ºC.

Güei vamos tener intervalos nubosos entemecios ente dellos claros con un aumentu de la nubosidá pela tarde qu’a ultima hora pue dexanos dalguna precipitación feble pel llitoral con unes temperatures en descensu ya col aire gallegu que mos va dexar raches fuertes de vientu en zones altes ya en puntos de llitoral.

Mañana vienres vamos tener el cielu mui nuboso pero sin malpenes preciptiaciones que llegarán a últimes hores cola llegada d’un frente poco activu, dexándonos les lluvies más abondoses col camudu’l día con unes temperatures másimes que camudarán poco, mentantu que les mínimes subirán dalgo. L’aire seguirá siendo gallegu, sicasí amenorgará y les raches de vientu nun pasarán de ser moderaes en zones altes ya en puntos del llitoral quedando seliquín nel restu d’Asturies.

El sábadu y sobre too’l domingu ya llunes les temperatures subirán bultablemente por mor del vientu ábrigu que soplará con fuercia en zones de montaña, apurriéndonos nubosidá pela cordelera y fastera surocidental onde nun se descarta dalguna precipitación que sedrán más probables el sábadu, pero esto yá lo diremos viendo.

Que paséis un bon xueves collacies ya collacios.