La Xunta Ganadera Llocal de Llanes vien de remitir un escritu a la Conseyería de MediuRural y Política Agraria y a tolos grupos parllamentarios de la Xunta Xeneral amosando la so refuga a la xestión que se ta realizando dende’l Principado sobre la Enfermedá Hemorráxica Epizoótica (EHE) qu’aquexa a un númberu xorreciente de ganaderíes asturianes.En concreto’l conceyu Llanes nun tien cuasi denguna  ensin vaques afeutaes.

Los ganaderos aporfien en que’l problema de la EHE «ye munchísimo mayor de lo que se reconoz», dalgo que s’evidencia nel fechu de que los albeites nun dan a bastu y malpenes tan garrándose muestres de sangre por falta de material y tiempu. La falta d’estos análisis non solo dificulta la llucha contra l’andanciu, sinón qu’al nun haber constatación oficial de los daños reales, los ganaderos nun podríen nun futuru recibir compensaciones poles reses perdíes pola enfermedá. 

Aparte de mostrar el so descontentu pola xestión que se ta faciendo, ensin protocolu claru, ya ensin saber qué gastos cubrirá o non l’administración, ensin accesu a medios siquiera por falta veterinarios, los ganaderos incluin nel so comunicáu una riestra de pidiciones: que’l diagnósticu clínicu valga pa contabilizar comu afeutaes por EHE, una bones nun se pueden facer los análisis, que s’afiten aides direutes por animales muertos y se copaguen los gastos veterinarios de los animales enfermos, que se bonifique la desinfección de los vehículos de tresporte de ganao y s’afiten mecanismos pa torgar que les esplotaciones afeutaes seyan penalizaes nes aides a la PAC del añu entrante.