Bonos díes, bona xente.

Alborecemos col cielu nuboso ya con unes temperatures que tan alrodiu de los 13ºC, rexistrándose nel puirtu Payares 7,4ºC.

Güei van dir abriéndose grandes claros durante la mañana y asina va tar durante tol día, sicasí a últimes hores la cola d’un frente fadrá aumentar la nubosidá que mos dexará precipitaciones febles na metá centru-ocidental que malpenes llegarán al restu d’Asturies. Les temperatures van caltenese suaves y l’aire sedrá sele ya variable, aumentando a últimes hores con raches moderaes a fuertes de componente sur en zones altes de montaña ya en puntos del llitoral.

Mañana xueves vamos tener el cielu mui nuboso con precipitaciones febles ya intermitentes, más probables na meta ocidental que malpenes llegarán a la oriental con unes temperatures en descensu ya col aire que dirá amenorgando pa quedar sele de componente noroeste.

El vienres abriranse dellos claros o abancios con unes temperatures másimes n’ascensu, mentantu les mínimes baxarán dalgo.

La fin de selmana tendremos un ambiente chornosu con temperatures n’ascensu, nubes medies y altes qu’empuercarán el cielu y vientu ábrigu anque nesta ocasión sedrá sele con brises na costa nes hores centrales del día.

Paez que’l martes-miércoles de la selmana viniente podriemos tener una entradilla de vientos de componente norte que mos dexarien un descensu bultable de les temperatures, precipitaciones y nieve pela cordelera pero esto yá lu diremos viendo.

Que paséis un bon miércoles collacies ya collacios.

Semeya que mos l’apurre’l nuesu collaciu Paul Coulette