Asturies perdió en 15 años 80.000 habitantes, tien 66.000 persones ocupaes menos, 21.400 en paru más, y el poder adquisitivu de los salarios amenorgóse’l 8,9%. Demiéntres tou esi tiempu caltúvose el mesmu partíu (PSOE) nel gobiernu
Los efectos de la llamada crisis del 2008 fueron llaceriosos pa la economía asturiana y les polítiques d’austeridá, retayos y reformes impuestos dende 2011 pol Partíu Popular ablayaron entá más l’actividá económica, desaniciando más emplegu, deteriorando les condiciones de trabayu y debilitando l’Estáu de bientar, col consiguiente aumentu de la probitú y les desigualdaes. N’Asturies, en contra de lo asocedío nel restu del estáu, nin la economía, nin el mercáu llaboral, nin les condiciones de vida y de trabayu se restableciéron entá d’aquella crisis, sinón que bien al contrariu fuéron atropéndose “crisis” socesives ensin pasar poles correspondientes fases de recuperación.
La economía española entardó nueve años en consiguir remontar aquella crisis, pero nel 2017 recuperaren yá los niveles d’actividá previos al 2008, lo que dexó encarar los siguientes envites con economíes reforciaes y salir d’ellos con mayor facilidá. Anguañi’l PIB español ye un 8,9% superior al d’entós, ente que l’asturianu ye un 3,7% perbaxo del de 2008. En cuanto al emplegu, a nivel estatal yá hai más persones ocupaes, mientres el mercáu llaboral asturianu tien alredor de 66.000 trabayadores menos qu’entós. Polo que se refier a los salarios, n’Asturies son un 8,9% inferiores a los de 2008.
Llucía F. Marqués
This work is licensed under a Creative Commons Attribution 4.0 International License.
