Asturies nun algamó denguna ventaxa nes negociaciones pa la investidura de Pedro Sanchez nel gobiernu d’España. De fechu, Asturies, representada esclusivamente por obedientes delegaos de los partíos madrileños, nun tuvo siquier presente nes negociaciones. Poro, hai territorios que ganen posiciones y meyoren la so situación y hai territorios que queden comu taben, ello ye, somorguiaos y serviles a la capital.
Asina lo recalcó’l secretariu xeneral y voceru parlamentariu de FORO Asturies na Xunta Xeneral, Adrián Pumares, quien acusa a Adrián Barbón de traicionar los intereses d’Asturies al anteponer el servilismu a los sos xefes de Madrid nos pautos d’investidura de Pedro Sanchez, permitiendo que s’algamaren alcuerdos que nun beneficien a Asturies pero si a otres comunidaes hestóriques. Amás de denunciar el servilismu pa con Madrid, apuntó a lo ridículo d’utilizar el llema “Asturies lo primero” cuando el PSOE lleva décades relegando los intereses de los asturianos por llealtá con gobiernu cientral.
Un mensaxe mui fuerte pa ser llanzáu por un partíu comu FORO, con fuerte perfil estatalista ya en xeneral tibiu nes sos actuaciones, comu demostró na cuestión de la oficialidá o la reforma l’estatutu.
El fechu que desencadenó estes crítiques foi la indefensión d’Asturies ante la falta de representación real propia nel gobiernu d’España, que la lleva a una permanente situación de discriminación.
Redaición InfoAsturies
This work is licensed under a Creative Commons Attribution 4.0 International License.
