Nuna entrevista publicada esti domingu nel diariu ‘El Comercio’ el conceyal trásfuga de VOX insinuó de nuevo’l so vetu a la contratación d’actuaciones n’asturianu, y trespasando toles llinies de la intolerancia, afirmó sobre l’asturianu que “es una lengua que no existe”
Los coleutivos de defensa de los drechos llingüísticos, Iniciativa pol Asturianu y N’Ast, desixen a l’alcaldesa de Xixón, Carmen Moriyón, que destituya de forma inmediata al presidente de Divertia, la empresa municipal encargada de la programación de festexos del conceyu, Oliver Suárez, conceyal trésfuga de VOX. 

Pa Iniciativa pol Asturianu ye inalmisible qu’un cargu públicu faiga declaraciones como estes, yá que “Suponen l’afitamientu de la discriminación de la ciudadanía falante d’asturianu, asina como un ataque a un patrimoniu cultural protexíu pol Estatutu d’Autonomía d’Asturies, la Ordenanza de Normalización Llingüística de Xixón y, por supuestu, la Constitución española”.
Dende N’ast alerten amás de 2los pelligros y consecuencies de caltener n’equipos de gobiernu a personaxes de nidiu calter facista y negacionista”, pidiendo a Carmen Moriyón que se posicione darréu ante’l tratu humildante que tan careciendo los asturfalantes por parte’l so gobiernu. 
La organización de reivindicación llingüística reclama a Carmen Moriyón qu’esclarie si caltién la confianza nun conceyal negacionista del asturianu que defende acciones discriminatories contra l’usu del idioma.

This work is licensed under a Creative Commons Attribution 4.0 International License.