Bonos díes, bona xente.

Alborecemos col cielu mui nuboso y dalguna precipitación feble, sobre too nel llitoral con unes temperatures que tan alrodiu de los 12ºC.

Güei vamos tener el cielu mui nuboso pero sin malpenes precipitaciones, sicasí nestes primeres hores lloverá dalgo na fastera norte d’Asturies principalmente y al finar el día un frente mos afeutará barriendo d’oeste a este Asturies. Les temperatures ascenderán y l’ambiente sedrá dalgo más suave.

Mañana xueves vamos tener otra vegada más el cielu mui nuboso con xarabatos ocasionales ya dispersos pero lo más destacáu sedrá’l descensu de les temperatures durante la tarde con una cota de nieve anicial sobre los 1800m pa quedar al finar el día sobre los 1000m. L’aire sedrá gallegu con dalguna racha molesta en zones altes ya en puntos del llitoral.

El vienres el pasu d’una borrasca va dexanos precipitaciones más abondoses ya frecuentes que’l xueves y nevaes moderaes pela cordelera, onde surdirá la nieve perriba de los 100m. L’aire de componenete noroeste mos va dexar tamién raches fuertes en zones altes ya en puntos de la costa amás de baxar la sensación térmica. Nun se descarta dalguna tronada que vendrá acompangada de xarazu o granizu, principalmente na metá norte d’Asturies.

El sábadu baxarán un poquitín más les temperatures y seguirá lloviendo y nevando pela cordelera y paez que’l domingu escamplará ya tendremos delles xelaes nes zones favoretibles.

Que paséis un bon miércoles collacies ya collacios.

Estos díes mos estáis empobinando delles semeyes que diremos, pali que pali, espublizando, muches gracies y un saludu candial.

Semeya de la sablera Rebolleres, pa Candás, nel conceyu Carreño de Xuan Nel Gonzali