Ayeri arrincó l’acción formativa “Desendolcu de Servicios d’Esperiencies Sidraturístiques”, un apueste per parte’l Club de Productu Sidraturismu al traviés de les ayudes p’acciones de Reskilling & Upskilling pa la formación de cualificación de la población activa y colectivos d’especial vulnerabilidá, nel marcu del plan de recuperación, tresformamientu y resiliencia.
Un cursu de baldre que se va desendolcar fasta’l próximu 14 d’avientu, nel salón d’actos de la Sala Polivalente de Cultura de Loreto, en Colunga y que busca’l propósitu de formar a persones interesaes na capacitación y profesionalización rellacionada col desendolcu d’esperiencies nel ámbitu de la Sidra d’Asturies y la so cultura. Esta formación ye la primera n’impartise en dicha materia, y pa ello cúntase con dellos formadores espertos en creación de productos turísticos, desendolcu rural, turísticu y padremuñu cultural, con temática enfocao a les visites guiaes, protocolu, atención al veceru o producción de mazana, pumaraes y tasties como recursos, ente otros aspeutos. Van Cuntar con una visita técnica pa potenciar les sos conocencies y ver “in situ” l’aprovechamientu de los recursos acomuñaos a la nuesa bébora más identitaria.
Ana Soberón, vicepresidenta del Club de Productu Sidraturismu Asturies, tuvo unes pallabres pa les asistentes, estimando la so participación y dexando claro que dende esti Club de Productu pretende algamase la excelencia y calidá en redol a la sidre, y pa ello ve necesario la formación; considera que ye una oportunidá pa tou aquel que quiera entamar una nueva actividá  rellacionada cola sidra y/o cultura sidrera, cuntando con xente esperto na materia que pueda asesorar y empobinar a la de ponelo en
marcha.

Pel so llau, José Ángel Toyos, alcalde de Colunga, estimó l’enfotu del C.P. Sidraturismu Asturies por realizar dicha actividá nel conceyu de Colunga, un de los conceyos de la Contorna de la Sidra y venceyáu al mundu sidreru; considera qu’hai qu’apostar por ello, por una cultura sidrera bien nuesa y afirmó que dende’l so conceyu intenten collaborar y participar nes distintes actividaes venceyaes a dicha cultura que van surdiendo.

Alberto Rodríguez

This work is licensed under a Creative Commons Attribution 4.0 International License.