Bonos díes, bona xente.

Alborecemos col cielu nuboso y fríu con unes temperatures que tan alrodiu de los 6ºC, rexistrándose nel puirtu Payares -2ºC.

Güei van dir aumentando les nubes nel trascursu la mañana cola llegada de baxes presiones al Cantábricu que mos apurrirán pela tarde xarabatos de calter moderáu, xeneralizaos ya de nieve perriba de los 1000-1200m que puen venir acompangáos de truena y xarazu ya granizu, principalmenete nel llitoral con unes temperatures en bultable descensu ya col aire de componente noroeste que va soplar con fuercia en zones altes ya en puntos de la costa.

Mañana sábadu seguiremos con xarabatos, sobre too durante’l riscar y primeres hores del día con tendencia a remitir y abrise dellos claros o abancios, pa quedar escampláu al finar el día cuando entamará a xelar nes zones de montaña ya favoretibles. L’aire de componente noroeste dirá amenorgando pa quedar sele ya variable.

El domingu alboreceremos con xelaes nel interior asturianu y el cielu escmpláu, durante’l día aumentará la nubosidá alta y pela tarde l’aire ábrigu fadrá subir les temperatures.

Paez que’l llunes una pequeña borrasca de pasu rápidu mos dexará dalgo de lluvia y nieve nes zones altes de la cordelera, el martes xelará ya tendremos bon tiempu y la ponte tará marcada pola inestabilidá col pasu de dellos frentes altánticos que mos apurrirán amás fuertes vientos y ascensu-descensu de les temperatures al so pasu pero esto yá lu diremos viendo.

Que paséis un bon vienres collacies ya collacios.

Semeya de la braña de L’Ablanosa que mos l’apurre la nuesa collacia Conchi Vallejo Suarez.