Bonos díes, bona xente.
Alborecemos col cielu empuercáu de nubes altes y dalguna xelada nes zones más favoretibles con unes temperatures que tan alrodiu de los 4ºC, rexistrándose nel puirtu Payares -1,3ºC.
Güei va dir n’aumentu la nubosidá media-alta que pue dexanos dalguna precipitación feble na fastera ocidental y llitoral central con unes temperatures másimes que van recuperase dalgo, mentantu les mínimes sedrán más baxes. L’aire va dir coyendo protagonismu y entamará a soplar ábrigu con raches moderaes al finar el día en zones altes de montaña ya en puntos del llitoral.
Mañana llunes dempués d’un riscar con precipitaciones abondoses van dir ganando terrén los xarabatos intermitentes ya dispersos que sedrán más abondosos ya frecuentes na costa por mor del vientu gallegu que fadrá que namás entren tímidamente facia l’interior asturianu . L’aire gallegu va soplar con fuercia y les temperatures descenderán con una cota de nieve que tará pela mañana perriba de los 1500m pa baxar al ataper a los 1000m.
El martes van abrise claros o abancios nel cielu y les temperatures sedrán baxes con un descensu nes mínimes y calteniéndose sin grandes camudos les másimes. L’aire amenorgará pa quedar sele ya varible.
El miércoles alboreceremos con escasa nubosidá y xelando nes zones más favoretibles pero rápidamente van dir entrando nubes medies y altes pa tapecer el cielu, l’ambiente seguirá siendo fríu con unes temperatures que camudarán poco.
El xueves l’aire ábrigu va dir coyendo puxu ya elevando les temperatures, amás un frente l’atlánticu regará la península Ibérica abondosamente, mentatu Asturies quedará al abellugu de la cordelera pero col pasu del mesmu de cara al vienres volveremos a tener xarabatos intermitentes y un descensu de les temperatures, surdiendo de nuevu la nieve pela cordelera anque de manera trasitoria porque de cara al sábadu ya domingu los vientos atlánticos volverán a calecer y templar l’ambiente, pero esto yá lu diremos viendo.
Que paséis un bon domingu collacies ya collacios.
Semeya d’esta mañana de la estación d’esquí de San Isidro
This work is licensed under a Creative Commons Attribution 4.0 International License.
