A la hora la verdá, naide da la cara pola oficialidá. L’interés na defensa la llingua de los partíos que saquen réditu políticu del paripé llingüísticu ye inversamente proporcional a la llonxanía de les elleiciones y mesmo quien lleva tola vida glayando en conciertos y manifestamientos posa sorriente na semeya qu’afita la enésima traición
Les delegaciones de la izquierda española n’Asturies, autoproclamaos cabezaleros de la llucha polos drechos llingüísticos (PSOE, IU y Podemos) vienen d’algamar un pautu pa sacar alantre los presupuestos del añu entrante.
En concretu, la diputada del Grupu Mistu na Xunta Xeneral, Covadonga Tomé (Podemos), confirmó esti sábadu que sofitará’l proyeutu de llei de Presupuestos Xenerales del Principado pa’l 2.024, afitando que cuntará con 23 votos y asegurando asina que saldrá alantre. Otra oportunidá de negociar la oficialidá esbardiada.
Dende Andecha Astur entruguen onde ta la dotación destinada a la implantación de la Oficialidá qu’estos mesmos partidos aporfien en defender “Nos Presupuestos nun se menciona siquiera la Oficialidá. Pa Podemos-IU la oficialidá ye un tema secundariu ¡ensiquiera la reconocen nos conceyos onde tienen mayoría!.”
Nel Dos Santos
This work is licensed under a Creative Commons Attribution 4.0 International License.
