Bonos díes, bona xente.
Alborecemos col cielu poco nuboso o escampláu y xelando en munches zones del interior asturianu con unes temperatures que tan alrodiu de los 2ºC, rexistrándose nel puirtu Payares 1,4ºC, mentantu nel puirtu Braña tienen -5,2ºC.
Güei vamos tener una mañana seliquina y fría pa dir aumentando la nubosidá alta durante la tarde, nun s’esperen precipitaciones hasta’l camudu’l día na fastera más surocidental d’Asturies con unes temperatures que van camudar poco, calteniéndose un ambiente fríu, sicasí al finar el día pue templar dalgo. L’aire sedrá sele ya variable.
Durante’l prósimu riscar va cruzanos un frente atlánticu que va tar mui amenorgáu na fastera central d’Asturies al tar al abellugu de la cordelera, amás l’aire ábrigu va facer subir les temperatures, mentantu na fastera ocidental y cara sur de la cordelera les precipitaciones sedrán más abondoses. Como’l frente nun vien con muncho airón, na cara sur de la cordelera, sobre too na fastera oriental, va caltenese’l fríu acumuláu d’estos díes ya podrá nevar perriba de los 1500m con una isoterma a 850hpa alrodiu de los 0ºC, mentantu n’Asturies rondaremos la +10ºC, contraste mui acentuáu y típicu d’estes situaciones que mos puen dexar una nevada na estación d’esquí de San Isidro y tar lloviendo a toles cotes na de Payares. Durante’l día tendremos dalgunos xarabatos y dirá templando en tol territoriu.
El vienres soplará l’aire gallegu y baxarán transitoriamente les temperatures con dalgunos xarabatos más probables nel llitoral ya intervalos nubosos entemecios ente claros o abancios y cola cota de nieve que rondará los 1500m.
El sábadu ya domingu l’aire ábrigu calecerá l’ambiente pa dexanos temperatures cercanes a los 20ºC amás d’apurrinos nubosidá media-alta y dalguna precipitación na fastera más surocidental d’Asturies.
Que paséis un bon miércoles collacies ya collacios.
This work is licensed under a Creative Commons Attribution 4.0 International License.
