Bonos díes, bona xente.
Alborecemos col cielu cubiertu por estratos, tando más escampláu na fastera surocidental y cordelera con unes temperatures que tan alrodiu de los 8ºC, rexistrándose nel puirtu Payares 2,1ºC.
Güei pali que pali van dir ganando los claros o abancios el terrén a les nubes pa quedar al finar el día’l cielu escampláu con unes tempertures másimes n’ascensu mentantu les mínimes baxarán ya se darán a últimes hores. L’aire sedrá sele ya variable con brises costeres.
Mañana sábadu alboreceremos con xelaes nes zones favoretibles y el cielu escampláu, sicasí puen surdir nublines ya borrinos no fonderu los valles. Durante’l día tendremos sol asgaya que mos dexará una xornada prestosa y afayaiza anque fría, polo menos a la solombra y l’aire sedrá sele ya variable con dalgo de nordés pela costa.
El domingu repetimos situación col cielu escampláu y xelaes nel llanu con iversiones térmiques importantes yá que les xelaes van dase por escasa irradiación no fonderu los valles, onde quedará l’aire fríu atrapáu por mor del escasu movimientu atlmosféricu y al ser más pesáu que’l cálidu, mentantu nes zones de media y alta montaña esfrutarán de temperatures primaverales y calecerá’l sol abondu. L’aire sedrá sele ya variable.
Tantu’l llunes como’l martes cada vegada enfriará más no foneru los valles mentantu les mases d’aire superiores sedrán más cálides favoreciu pola dorsal anticiclónica situada enrriba nuesu, el cielu seguirá escampláu y les temperatures en media y alta montaña mos dexarán un ambiente primaveral ya ivernal no fonderu los valles col aire que seguirá siendo sele ya variable.
El miércoles ya xueves la entrada de vientos máritimos mos apurrirán humedá con precipitaciones febles en xeneral y dalgo de nieve pela cordelera, amás d’una normalización de les temperatures con un descensu bultable nes zones altes ya un ascensu nes zones baxes, xelando nes cumes de la cordelera y suavizándose abondu na fastera norte d’Asturies.
De cara a los siguiente díes dirá meyorando dalgo y ye probable que de cara a la nueche bona y Navidá tengamos de nuevu’l cielu escampláu y xelaes nuecherniegues pero esto yá lu diremos viendo.
Que paséis un bon vienres collacies ya collacios.
Semeya del nuesu collaciu Zaquiel Sánchez.
This work is licensed under a Creative Commons Attribution 4.0 International License.
