Bonos díes, bona xente.
Alborecemos col cielu escampláu y xelando nel interior asturianu nes zones favoretibles con unes temperatures que tan alridu de los 2ºC, rexistrándose nel puirtu Payares 6,9ºC, destacando los -14ºC de Prado Veneiro en Babia mentantu nel Picu La Llambria a 1.700m rexistren 13ºC.
Güei vamos tener el cielu escampláu turante tol día, sicasí nel llitoral y fastera central a últimes hores puen entrar dalgunos estratos de la marina. Les temperatures van tar mui condicionaes pola estabilidá anticiclónica y el nulu movimientu atmosféricu, rexistrándose les másimes nes cumes de les montañes ya les mínimes no fonderu los valles por mor de la iversión térmca. L’aire sedrá sele ya variable con brises pela costa.
Mañana llunes tendremos dalgo más de nubosidá estratificada nel llitoral y posiblemente fastera central d’Asturies, dixebrándose pela mañana. Xelará nes zones favoretibles del interior ya volveremos a tener iversión térmica, descendiendo les temperatures según mos vayamos acercando a lo fonderu los valles y ascendiendo la temperatura según vamos subiendo les montañes nes zones soleyeres y ventilaes. L’aire sedrá sele ya variable con brises pela costa.
El martes vamos seguir baxo la influencia del anticiclón que mos grantizará tiempu estable y soleyeru, mentantu a partir del miércoles la entrada de vientu de componente norte mos empobinará nubosidá y precipitaciones pero esto yá lu diremos viendo.
Mui destacable estos díes los datos que mos ta aportando la estación meteorolóxica del Picu La LLambria atraviés de Noromet. Baxo un potente anticiclón vese perfeutamente como una masa fría pali que pali va aposentándose no fonderu los valles, mentantu una masa cálida, menos pesada y estremadamente seca situase perriba nuesu, faciendo que veamos rexistros realmente alucinantes como’l 0% de humedá na estación de La LLambria con 14ºC de temperatura ayeri de nueche, al mesmu tiempu que nos valles entamaba a xelar con humedaes alrodiu del 90%.
Que paséis un bon domingu collacies ya collacios.
This work is licensed under a Creative Commons Attribution 4.0 International License.
