La decisión llega depués de que’l responsable del Serviciu tuviere ensin ocupación dala nel so puestu de trabayu dende la llegada a la Casa Conceyu del equipu de gobiernu municipal nuevu

La entrada del PP na Ca’l Conceyu de Castrillón traxo consigo el desdexamientu del Serviciu de Normalización Llingüística, qu’agora anuncia’l so preslle. De seguir p’alantre con esa decisión, aparte d’afondar na discriminación llingüística de los asturfalantes castrillonenses y dase un pasu p’atrás na necesaria llabor polos drechos llingüísticos, Castrillón perdería los 19.400 euros destinaos a esti serviciu nel borrador de presupuestos del Gobiernu asturianu pal próximu añu.

Esti Serviciu nagurárase’n payares del 2013, suprimióse nel 2017, recuperóse nel 2020 y torna suprimise agora. L’Asociación en defensa l’asturianu, n’Ast, denuncia la dependencia qu’esti muérganu de gobiernu tien de los vaivenes políticos, aporfiando en que mientres nun se cuente con una Oficialidá que blinde los drechos llingüísticos cualisquier midía a favor d’ellos queda albentestate “Esti ye otru casu que demuestra qu’ensin oficialidá siempres taremos a mercé de los gobernantes de turnu”.

Pel so lláu Iniciativa pol Asturianu ya reclamó la reapertura del Serviciu y recuerda al PP que los conceyos son competentes p’asegurar la efectividá del exerciciu de los drechos llingüísticos de la ciudadanía acordies cola Llei d’Usu y Promoción del Bable/Asturianu, llei qu’oficialmente defende esti partíu. 

Alberto Rodríguez

This work is licensed under a Creative Commons Attribution 4.0 International License.