@eltiempunasturies

Bonos díes, bona xente.

Alborecemos col cielu cubiertu y lloviendo con unes temperatures que tan alrodiu de los 10ºC, rexistrándose nel puirtu Payares 2,1ºC.

Güei pali que pali les precipitaciones dirán retirándose quedando concentraes na cordelera oriental principalmente, onde sedrán de nieve perriba de los 1300m. Nel restu vamos tener dalgún xarabatu dispersu, cola apertura de dellos claros a lu llargu del día. Les temperatures en bultable descensu nes zones altes de montaña y con ascensos de les mínimes, tamién bultable, no fonderu los valles onde nun camudarán les másimes. L’aire de componente norte con dalguna racha moderada en zones altes ya en puntos del llitoral.

Mañana xueves vamos tener dalgo de nubosidá pero sin precipitaciones con apertura de claros o abancios y temperatures n’ascensu. L’aire gallegu pue soplar molestu en zones altes ya en puntos de la costa.

El vienres seguiremos con nubes ya claros o abancios, siendo más abondoses les nubes nel llitoral onde nun se descarta dalgún orpín al atapecer con unes temperatures en llixeru descensu, sobre too les mínimes, pudiendo xelar nes zones más favoretibles del interior y montaña. L’aire amenorgará pa quedar sele ya variable.

El sábadu, domingu ya llunes paez que tendremos escasa nubosidá con un descensu nes temperatures mínimes, pudiendo xelar nes zones más favoretibles, mentantu les másimes camudarán poco.

A más llargu plazu la atmósfera tan dando signos de camudos importantes de cara a primeros d’añu pero esto yá lo diremos viendo.

Que paséis un bon miércoles collacies ya collacios.

Semeya que mos l’apurre la nuesa collacia Conchi Vallejo.

This work is licensed under a Creative Commons Attribution 4.0 International License.