La Coordinadora Ecoloxista d’Asturies convoca la so trixésima primer edición del premiu La Bullada de Purpurina. Esti galardón, que s’entrega’l 28 d’avientu, reconoz el llabor d’empreses, instituciones y alministraciones que destacaron a lo llargo del añu poles sos acciones antiecologistas, perxudicando n’alto grau al mediu ambiente asturianu.
El pasáu añu 2022 l’anti-premiu foi apurríu a Juan Cofiñu González, actual presidente de la Xunta Xeneral, mientres desempeñó’l cargu de vicepresidente y conseyeru d’Alministración Autonómica, Mediu Ambiente y Cambéu Climáticu, pola so nefasta xestión na conseyería. D’ente los sos méritos pa llograr estos lloreos, destaca’l proyectu de Llei de calidá Ambiental, que va acabar col yá escasu control que tienen los vecinos sobro los ataques ambientales nes sos redolaes. Y ente otres, tamién se-y premió poles sos continues declaraciones engañoses nes que negó la contaminación del aire una y otra vez.
Nel 2023 foron abondos los candidatos propuestos pal premiu. Tres una perdifícil peñerada, los finalistes rellumaron por méritos propios. D’ente ellos, el xuráu va tener la ingrata xera d’escoyer a un namás, a pesar de la bayura de razones qu’esisten pa premialos a toos.
A la tiesta de la llista ta’l Principáu d’Asturies al completu, pola so nefasta xestión ambiental en toles sos árees, que mos caltien comu cabezaleros de contaminación del aire del estáu y a la cola del reciclaxe y la esperanza de vida. Con ellos, nomínase la presidenta de la Comisión Europea Ursula von der Leyen, por promover a tenor de les sos opiniones puramente personales (y devasando les funciones del so cargu) cambeos de la postura de la Unión Europea que son contrarios a la protección ambiental y los drechos humanos.
Otru de los nominaos ye’l conseyeru de Mediu Rural Marcelino Marcos Líndez, que nes sos comparecencies nes Xunta Xeneral regaló delles perlles como sofitar el cultivu de más ocalitos “porque ye’l cultivu más rentable”, la so negativa a acutar zones quemaes “porque los ganaderos nun son los responsables de les quemes”, o sofitar el control del llobu “porque nun tendría de tar protexíu pol Ministeriu”. Bonos collacios d’esti caberu, torna ser nominada la empresa papelera Ence, en Navia, por siguir emprobeciendo’l país, enchiéndolu d’ocalitos, col impactu ambiental que suponen, atentando contra’l nuesu ecosistema primiendo por que se apruebe’l cultivu de la variante d’ocalitos Nitens, una vegada que la Globulus escose la so rentabilidá.
Dientro les empreses contaminantes nun podía quedar ensin mencionar Arcelor, n’Avilés, Corvera, Gozón, Carreño y Xixón, pola implacable contaminación del aire, l’agua y el suelu, paralizando de cutio, les reformes ambientales comprometíes nes sos instalaciones y pa finar, Orovalle, en Belmonte y Salas, por siguir contaminando colos sos arramaos na planta de tratamientu de Belmonte y por amenaciar tol occidente asturianu colos nuevos proyectos mineros pa la busca d’oru.
El fallu del xuráu sedrá la próxima selmana y la Bullada Purpurina va apurrise, simbólicamente, el 28 d’avientu.
Nel Dos Santos
This work is licensed under a Creative Commons Attribution 4.0 International License.
