La mala xestión del Principado dexará a cientu once profesores ensin cobrar el sueldu d’avientu fasta finales de xineru

Amparándose nuna instrucción xeneral pa tola Administración autonómica, les nómines de los docentes contrataos de magar l’un d’avientu y a lo llargo de tol mes nun foron tramitaes a tiempu, polo que la so paga d’esti mes sedrá retenida fasta finales del mes que vien, cuando se-yos integrarán les dos pagues -la d’avienty y la de xineru- al mesmu tiempu.

Con ello, la Conseyería d’Educación asturiana ta dexando a más de cien persones ensin cobrar el so sueldu estes navidaes. Trátase sobre tou de profesores que cubren baxes temporales, normalmente xente mozo que ta entamando la so vida llaboral, polo que la so situación yá ye bien precaria d’antemán.

Recordemos que los docentes asturianos tan pente los que menos cobren de tol estáu, teniendo una nómina fasta 550€ menor qu’un vascu que desendolque’l mesmu trabayu.