Cientos de persones aconceyaron ayeri delantre’l Teatru Xovellanos pola Sanidá Pública Asturiana: “Yá entremos nel gran sortéu de la Sanidá Privada. Les boles de los recursos públicos pasaron a formar parte del bombu nel que s’atopen les de los recursos privaos”
La concentración pola Sanidá pública asturiana ya en denuncia de la so progresiva privatización tuvo llugar un dia anantes del sortéu de Navidá, asonsañando la manera que tienen de xugar cola salú del pueblu, financiando con recursos públicos empreses privaes al tiempu que se ñega a la población l’acesu a una atención sanitaria de calidá. “Esto va sirvir para enllenar la barriga de xigantes privaos que’l so negociu ye especular cola sanidá, a cuenta de debilitar el nuesu sistema públicu de salú. La garantía de los nuesos derechos son los Servicios públicos” aporfien dende los organizadores, la Plataforma pola Salú Pública.
Con sentíu del humor y munchu maxín, demientres la concentración canciáronse villancicos revindicativos y “sorteáronse” meyores na sanidá pública, con “pedrees” de contratación de personal, premios grandes de fin de llistes d’espera ya’l gordu de Derogación de la Llei 15/97 aprebada pol gobiernu d’Aznar y que permite desviar perres públiques a empreses privaes. “Los gobiernos socialistes nun la derogaron, asina que paez que la única esperanza que mos queda ye que nos toque na llotería de Navidá”.
Nel Dos Santos
This work is licensed under a Creative Commons Attribution 4.0 International License.
