Los porgüeyos económicos ya’l desenfrenu turísticu pasen otra vuelta perriba les necesidaes de proteición d’un espaciu natural perimportante, ignorando les consecuencies de los continuos episodios de masificación

La Oficina Téunica d’Europarc-España, foru profesional de les árees protexíes n’España, onde s’alderiquen y ellaboren propuestes para la meyora de los espacios naturales y que participa viviegamente na Federación EUROPARC, organización paneuropea creada en 1973 qu’axunta instituciones de 39 países dedicaes a la xestión d’árees protexíes y a la defensa de la naturaleza, ellaboró un informe qu’alerta del problema que la masificación de los Llagos de Cuadonga implica pa un aria de tala importancia ñatural. 

Los autores del informe. qu’aporfia na urxente necesidá d’una regulación más estricta del accesu a los llagos de Cuadonga señalen que “un enclave como los llagos de Cuadonga, nel corazón del parque nacional de los Picos d’Europa, nun puede soportar alrodiu d’8.000 visites al día, xenerando continuos episodios de masificación, que causen insatisfaición del públicu visitante, inseguridá y posible afección a los recursos naturales. Corremos el riesgu de convertir l’espaciu protexíu nun parque periurbanu, onde tou val” y poru reclamen amenorgar de forma drástica la entrada de visitantes. 

Sicasí, los alcaldes de los conceyos afeutaos prefieren facer oyíos sordos y matar a la pita los güevos d’oru, polo que n’aconceyamientu telemáticu de cerca tres hores desixeron al Patronatu del parque nacional de Picos d’Europa retirar esi estudiu -entá reconociendo que “ye un bon trabayu- pa protexer los sos intereses económicos. El Patronatu cedió a les presiones de los ediles, retirando l’estudiu. Per otru lláu, el Plan rector d’usu y xestión del parque nacional, continúa atropando socesivos retrasos.