Bonos díes, bona xente.
Alborecemos col cielu poco nuboso o escampláu y xelando no fonderu los valles con unes temperatures que tan alrodiu de 1ºC, rexintrándose nel puirtu Payares 5,1ºC
Güei tendremos yá dalgo de nubosidá alta que malpenes velará al sol con unes temperatures másimes que suben un pelín más ya col aire que sedrá sele ya variable.
Mañana miércoles alboreceremos de nuevu col cielu poco nuboso o escampláu, sicasí pue tar empuercáu per dalguna nube alta que durante la mañana va dir n’aumentu hasta dexar el cielu nuble pela tarde. Les temperatures mínimes camudarán poco, mentantu les másimes subirán otru poquitín más. L’aire ábrigu entamará a soplar y pue facelu moderadamente en zones altes de montaña.
El xueves vamos tener el cielu mui nuboso con precipitaciones febles con un ascensu bultable de les temperatures mínimes por mor de la nubosidá y l’aire ábrigu con unes másimes que camudarán poco calteniéndose suaves en xeneral.
El vienres vamos tener un tiempu mui asemeyáu anque al escurecer tenderá a quedar poco nuboso. Y de cara a fin d’añu paez ser que los modelos meteorolóxicos quitaron d’un plumazu la vaguada atlántica que se véia fae unos díes ya tendremos altes presiones con vientu ábrigu que mos apurrirá dalgo de nubosidá y temperatures suaves pero esto yá lu diremos viendo.
Pa más llargu plazu, nun antes de reis sigue viendose camudos importantes na circulación atmosférica pero esto yá ye otru capítiulo.
Que paséis un bon martes collacies ya collacios.
Semeya del macizu del Mampodre del nuesu collaciu Roberto Cabal.
This work is licensed under a Creative Commons Attribution 4.0 International License.
