Esta pasada selmana apaecieron numberoses aves lletrocutaes so una torreta eléctrica en Xixón Oeste. Tamién se toparon delles aves más embaxo, con quemadures nes plumes, que les incapaciten pa esnalar, quedando indefenses dafechu énte atropellos, depredadores etc.
Dende la Coordinadora Ecoloxista d’Asturies denuncien la lletrocución de decenes de páxaros ya encamienten al Gobiernu d’Asturies a que desixa a la empresa responsable de la instalación que se corrixan dafechu los defectos d’esta infracadarma pa evitar nuevos accidentes.
La lletrocución de les aves nesta torreta demuestra la falta d’un correctu aislamientu na mesma, col consecuente riesgu pa cualquier ave que se pose nella. Ye de destacar amás que dicha infracadarma ta nuna zona d’intensu tránsitu de persones, lo que podría suponer un peligru pa les mesmes.
La lletrocución ye una de les causes de mortalidá más importante pa les aves, según recueyen numberosos estudios científicos, polo que la llexislación impunxo midíes p’amenorgar estes muertes al traviés de midíes preventives.
Conforme a les normes de la Unión Europea sobro responsabilidá medioambiental, incorporada al drechu internu por aciu la Llei 26/2007, los operadores titulares de l’actividá económica sobro diches cadarmes y tendíos llétricos, tienen el deber d’adoptar, ensin demoranza y ensin necesidá d’alvertencia, de requerimientu o d’actu alministrativu previu, les midíes preventives y reparadores afayaices. La inacción de los operadores pue ser oxetu d’un procedimientu alministrativu de responsabilidá medioambiental, entamau d’oficiu pola mesma Alministración Pública competente o a solicitú de parte interesada.
La xurisprudencia española obliga a les empreses llétriques a tomar midíes preventives pa evitar estos accidentes, midíes que nun se tomaron nesti casu y que dende la Coordinadora Ecoloxista d’Asturies denunciaron énte’l Gobiernu d’Asturies.
Nel Dos Santos
This work is licensed under a Creative Commons Attribution 4.0 International License.
