Les dos autores de “La sidra nel Muséu del Pueblu d’Asturies”, Vera Anikina, fotógrafa, y Llucía Fernández, escritora, punxeron en valir la coleición de pieces venceyaes a la sidre que s’esponen nel Muséu y que foron la ispiración pal so trabayu
“La sidra nel Muséu del Pueblu d’Asturies” ye un llibru peculiar, en pallabres de la so autora lliteraria, una obra duple que xune nun solu llibru les imáxenes -de gran calidá- de les pieces que se curien nel Muséu del Pueblu d’Asturies con una hestoria ficticia dafechu inspirada neses imáxenes.
Les semeyes, obra de Vera Anikina, recueyen esquisitamente la coleición museográfica, recreándose na llume y les testures, treslladando al llector a otru llugar y otra época, na qu’aquellos yeren los oxetos cotidianos del díi ente díi.
Afilvanaes con elles, les pallabres de Llucía Fernández van trazando a grandes rasgos una hestoria “como toles que se viven n’Asturies” inseparable de la sidre. Lloñe de ser un catálogu, la obra narra la vida d’una familia marcada por un pasáu que ya nun esiste y pol arume a sidre que los acompanga a lo llargo del so percorríu.
“Entregáronseme unes imáxenes y pidióseme qu’escribiere sobre elles, asina que fui dexando que les semeyes me foren falando; d’ehí ñaz la hestoria d’amor y alcordanza pente sidre y toneles que podeis alcontrar nel llibru”, desplica Llucía.
El llibru ta ya disponible pa la venta na páxina web de la revista LA SIDRA y na nuesa tienda InfoAsturies, y ceo tará nes meyores llibreríes.
This work is licensed under a Creative Commons Attribution 4.0 International License.
