Bonos díes, bona xente.
Alborecemos col cielu emborrináu y orpinando con unes temperatures que tan alrodiu de los 10ºC, rexistrándose nel puirtu Payares 3,6ºC.
Güei vamos tener el cielu mui nuboso por nubes de tipu baxu polo que’n cumbres de la cordelera ye probable que s’abran dellos claros, nel restu nun sedrá hasta’l escurecer cuando remita la nubosidá con unes temperatures que van camudar poco.
Mañana sábadu vamos tener una mañana seliquina con escasa nubosidá y temperatures afayaices nes hores centrales del día, dalgo más fresco n’alborada. Yá pela tarde aumentará la nubosidá y arreciará l’aire gallegu en zones altes ya en puntos del llitoral.
El domingu pela mañana un frente atlánticu asociáu a una vaguada va barrer Asturies d’oeste a este anque nun dexará munches precipitaciones ya inclusu en delles zones de la fastera central asturiana malpenes cuatro gotes, sicasí descenderán les temperatures ya tendremos dalguna nevada pela cordelera perriba de los 1300-1400m que la teñirán de blancu pa finar l’añu. L’aire gallegu tenderá amenorgar a últimes hores cuando predominarán los claros o abancios.
El nuevu añu alboreceremos ente nubes ya claros y temperatures fríes que’l vientu ábrigu encargarase de dulcificar nel trancursu de la mañana, amás d’empobinanos nubosidá de tipu mediu-altu que nun mos dexará precipitaciones na más que na fastera más surocidental d’Asturies de forma feble ya dispersa.
Pa más alantre, entornu al día 5 vienres ye probable que tengamos una entradilla fría del noroeste que mos dexe dalgo más d’agua y sobre too nieve pela cordelera pero esto yá lu diremos viendo.
Que paséis un bon vienres collacies ya collacios.
Semeya que mos l’apurre la nuesa collacia Conchi Vallejo.
This work is licensed under a Creative Commons Attribution 4.0 International License.
