La planta d’Amazón en Siero ta a piques de convertise nel Petromochu particular d’Adrián Barbón, nuna Zalia II o nun epílogu a la película de los Fondos Mineros. El macroproyeutu, con abonda financiación pública pa facilitar la llegada d’Amazon a Siero, va quedar nuna nave abandonada

L’anunciu de la llegada de Amazon a Asturies fíxose de gaita y tambor “una de les mayores plantes lloxístiques d’Europa”, “la solución llaboral pal conceyu de Siero y vecinos”, apostándose ensin duldar por esti proyectu, pesi a les alvertencies sobro les precaries condiciones llaborales que la empresa caltien en tol mundiu y de los avisos de retrocesu qu’implicaben los despidos en numberosos centros de la mesma.

N’ochobre fizo un añu que remataron les obres y énte la falta de noticies d’apertura del centru lloxísticu de Amazon nel polígonu de Bobes entamaron les duldes, qu’agora se confirmen, sobro la viabilidá del proyectu. La inversión pública calculada cífrase’n siquier 4,4 millones d’euros en conceutu de sovenciones, cola previsión de crear unos 2.000 puestos de trabayu. Sicasí, el silenciu qu’arrodia la operación no que cinca a inversión y alcuerdos algamaos fae imposible conocer el coste completu pa les arques asturianes. A esa cifra ye precisu añedir les infracadarmes diseñaes a costafecha pa beneficiar a esti proyectu.

Tres dellos meses repitiendo que l’apertura ta próxima, la empresa global de distribución vien d’anunciar que paraliza los sos  planes d’espansión en tol estáu “énte la ralentización del consumu” y suspende los sos proyectos de centros lloxísticos non solo n’Asturies, sinón tamién n’Aragón, Estremadura, Catalunya y Euskadi, dexando albentestate 4.000 empleos, dientro d’un plan global de retayu de plantiya que preve 27.000 baxes en tol mundu.

Alberto Rodríguez