Yá hai un 25% del aforu vendíu pa esti II Semando Fest qu’aporta’l 9 de febrero a la sala Lata de Zinc d’Uviéu y nel que va sonar la tonada, rap, folk celta y punk, colos conciertos de Sandra Álvarez y Noemí González, Mostru l’Horru, Guieldu y Ochobre
Tres la exitosa edición del añu pasáu -qu’escosó les sos entranes nos díes enantes de la so celebración-, vuelve Semando Fest, el festival de Música Moza n’Asturianu qu’entama Musicasturiana.com y Ixuxú
Cultura. Nél van volver a participar cuatro proyectos d’estremaos estilos musicales cola característica en común de que la mayoría de los sos componentes son menores de 34 años y nos que destaca tamién
qu’hai una importante presencia femenina , con siete muyeres que van tar enriba l’escenariu. D’esta manera, el festival trabaya tamién por avanzar hacia la igualdá dientro de la música n’asturianu.
Precisamente, la iniciativa va más allá de ser un simple conciertu y por eso tien tou una filosofía que se caracteriza por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y
oportunidaes a los y les creadores mozos.
La cantadora Sandra Suárez y la escritora Noemí González van ufrir un orixinal espectáculu qu’entemez asturianada y poesía feminista. Mostru l’Horru va interpretar el so rap con lletres reivindicatives y unes bases hip hop influenciaes por estilos como’l rock o’l reggae. La música celta, el new age ya’l folk que bebe de la tradición sonora asturiana y atlántica ye lo que van representar GUIELDU nel so conciertu.
Pa poner el ramu a la nueche, OCHOBRE van descargar el so PUNK, rock, ska y folk combativu.
Les entraes ya tan a la venta a un preciu de 10 € pa menores de 26 años y 12 € pa mayores, cola posibilidá d’alquirir, por 20 €, la entrada col CD Semando Son. La cuarta parte l’aforu ta ya vendíu.
Alberto Rodríguez
This work is licensed under a Creative Commons Attribution 4.0 International License.
