Sentir Asturies, conducíu pol escritor y periodista Inaciu Galán, vuelve a les ondes de la RPA. Va ser esti vienres, 5 de xineru, de 23:00 a 00:00 hores, nuna entrega nueva d’esti magacín fecho por xente mozo
Cuatro Gotes Producciones retoma asina esti proyectu que pretende dar a conocer “qué ta asocediendo al nuesu alredor, fuera d’Asturies y los nuevos enclinos nes redes sociales, la cultura y la tecnoloxía”. Too ello nun tonu distendíu y col asturianu como llingua vehicular.
L’equipu de collaboradores amplíase con nomes como los de Lluís Fanjul, Jennifer Berrocal, Raúl Alonso, Pelayo Martínez Olay o Lluci Miravalles, ente otros que se van dir desvelando a lo llargo de los sos programes. “Sentir Asturies quier llegar a un públicu nuevu, que se sienta identificáu cola nuesa forma de ver l’actualidá y Asturies. Pero non por ello va dexar fuera a otru públicu d’edá más avanzada o que peracaba otru tipu de conteníu“.
Tamién va afalase la participación de los oyentes yá seya al traviés de les redes sociales o de mensaxes al programa per WhatsApp nel númberu de teléfonu 621 279 215.
Sentir Asturies ye un programa fechu por xente mozo, que nun escaez por ello la relevancia de la esperiencia, col asturianu como idioma vehicular y plantegáu non solo pa falar d’Asturies, sinón pa falar de tolo qu’esmolez ya importa al oyente, pero dende Asturies: l’actualidá, la cultura, la ciencia y l’ociu; l’alderique políticu y social. Y too con munchu humor, que nun quier dicir falta de seriedá: los collaboradores son espertos y bonos divulgadores al empar, respetaos nos sos ámbitos pero que tamién van saber llegar al oyente na so casa de forma amena y divertida.
Alberto Rodríguez
This work is licensed under a Creative Commons Attribution 4.0 International License.
