El congresu, que se cellebrará los díes 16 y 17 de mayu, va centrase nel oxetivu prioritariu, tantu na redolada rural como na urbana, d’afalar la cohesión social ya igualdá d’oportunidaes na nueva era de la intelixencia artificial
El Palaciu Congresos de Xixón va allugar los díes 16 y 17 de mayu’l congresu “Cohesión social ya igualdá d’oportunidaes na era de la intelixencia artificial”, nel que ta previstu que participen más de 200 persones. L’eventu ta entamáu por cuatro redes nacionales a les que pertenez el Conceyu de Xixón: la Rede de Territorios Socialmente Responsables (RETOS), la Rede d’Entidaes de Desendolcu Llocal (REDEL), el Foru de Ciudaes pol Emplegu y la Rede de Ciudaes Innovadores INNPULSO.
El congresu, el segundu entamáu por estes asociaciones, centraráse na planificación urbana y l’anovación como activos estratéxicos p’afalar les polítiques públiques. Amás, sorráyase la importancia de que les alministraciones llocales s’afaigan a los nuevos avances. Les Axendes Urbanes y los sos planes d’acción apurren pautes bien definíes pa esti propósitu y son cruciales pa promover ferramientes y enfoques que fomenten l’anovación nesti contestu.
Trataráse de cavilgar sobre les estremaes fiendes y desigualdaes nel accesu al emplegu, a la vivienda, fiendes dixitales, fiendes económiques, fiendes de xéneru, por edá, barreres de movilidá, mediu ambientales… conociendo tamién esperiencies puestes en marcha n’otros llugares que pueden valir d’ispiración pa buscar soluciones.
Pa ello, va ponese’l focu en trés ámbitos principales: los cambeos que trae consigu la intelixencia artificial, la necesidá de frenar la fuga de talentos y el xorrecimientu caltenible, enfrentando cuestiones comu la xenrificación, la meyora del emplegu, el reciclaxe llaboral o la necesidá de polítiques integrales enfocaes a estes cuestiones.
Susana Sela
This work is licensed under a Creative Commons Attribution 4.0 International License.
