L’aire de Xixón nun ye aptu pa la salú humana

15 Xineru, 2024

Acordies los datos oficiales qu’acaba de facilitar el Gobiernu d’Asturies na so web sobro contaminación atmosférica y calidá del aire nel añu 2023 constatáronse niveles elevaos de contaminación en gran parte de les estaciones que miden la calidá del aire nel conceyu de Xixón

Nel casu del bencenu, la OMS encamienta nun esponese a nenguna concentración d’esti hidrocarburu. Esto ye, nun atopa aceptable nengún nivel de concentración de bencenu nel aire per debaxo del cual nun se prevean consecuencies adverses pa la salú, por cuenta del so altu potencial canceríxenu. Sicasí, en Xixón vívese baxo la influencia contiuna d’esti contaminante, qu’esti añu tuvo un incrementu mediu del 19% nes 6 estaciones que lu miden. De fechu, la estación móvil allugada nel Arbeyal presento’l segundu peor valor de toa Asturies, con una media añal de 1,8 µg/m³.

Nel casu de les PM2.5, partícules de menos de 2,5 micres, son les qu’enfusen más fondamente nel nuesu organismu col consiguiente perxuiciu pa nuesa salú; la OMS encamienta nun superar unos valores llende de 5 µg/m3 de media añal y un valor d’alerta con una media diaria de 15 µg/m3.

De les 8 estaciones que miden esti contaminante nel conceyu, toes doblaron los valores llende encamentaos pola OMS, destacando los valores rexistraos na móvil nel Arbeyal mientres tuvo operativa que solo fueron 241 díes, con una media añal de 14,2 µg/m³, cuasi triplicando’l valor llende establecíu pola OMS. Nesta estación superáronse mientres 90 díes los valores llende encamentaos pola OMS pa esti contaminante. Tamién se rexistraron malos datos na estación de control de calidá del aire de la Santa Cruz, con una media añal de 12,2 µg/m³. Equí superáronse los valores llende diarios encamentaos pola OMS mientres 76 díes.

Nel casu de les partícules de menos de diez micres, les PM10, la OMS encamienta nun superar la llende de 15 µg/m3 de media añal y de 45 µg/m3 de media diaria.

De les 17 estaciones que miden esti contaminante nel conceyu, toes superaron los valores llende encamentaos pola OMS. Son de destacar los datos rexistraos na estación móvil del Arbeyal, con una media añal de 30,3 µg/m³. Nel tiempu que tuvo supero en 39 ocasiones los estragales de contaminación afitaos en 50 µg/m3 de l’actual normativa española de media diaria. El siguiente peor valor medio tenémoslu na escondida estación de la Calzada, onde hubo de media añal 29,8 µg/m³

Nel casu de los ósidos de nitróxenu en forma NON2, la OMS encamienta nun superar la llende de 25 µg/m3 de media diaria, nin una media añal de 10 µg/m³.

La estación de Pumarin presentó los peores datos pa esti contaminante, con una media añal de 20,1 µg/m³ y 98 díes nos que se superó’l valor llende diariu encamentáu pola OMS.

La evidencia científica nun suxier nengún estragal per debaxo del cual nun se prevean efectos adversos a la salú tres la esposición a la contaminación. Entá perbaxo de los niveles de calidá d’aire consideraos como seguros pola llexislación ambiental, los contaminantes acomuñense con efectos nocivos sobro la salú, polo que la OMS encamienta amenorgar tolo posible la esposición a los mesmos. Encamientu que n’Asturies s’incumple de forma significativa.

Alberto Rodríguez