Llucía F. Marqués
Circulu viciosu: La mayoría de los asturianos vivimos, económicamente falando, nel arba la ruina. Como nun hai perres, mercamos en grandes superficies o por interné, que ye más barato. Mandamos les perres a paraisos fiscales a miles de kilómetros, entantu los nuesos vecinos pierden el su mou de vida y asina vamos dexando a Asturies más probe pali que pali.
Na mio cai -cai de barriu, non mui llarga, non mui comercial- presllaron nos caberos tiempos 11 establecimientos. Cierto ye que dalgún d’ellos preslló y tornó a abrir con otru negociu…reiteradamente, fasta tres negocios estremaos nel mesmu llocal nun añu. De cuando vine yo a vivir pa equi, dirá 12 años, queden cuatro abiertos: dos chigres, la farmacia y una peluquería. Pensaba yo, inocente, que tenía que ver con eso de ser una cai de barriu, qu’equí hai poques perres, que la xente baxa al centru a mercar. Quiá, en centru tan igual. Llocales presllaos na cai Corrida, na Uría, La Cámara o el Dorado, cais comerciales de les principales ciudaes d’Asturies que ya nun lo son, allugamientos anantes cobiciaos qu’agora escolinguen indefinidamente cartelos d’inmobiliaria.
Pero una cosa ye decatase del andanciu de preslles y otra estremada conocer la cifra: mediu millar. Nel caberu añu, 500 piqueños comercios de venta direuta presllaron les sos puertes, cuasi 14 al día.
Baráxense delles causes: apertura de centros comerciales, Amazon, impuestos, inflación… la realidá ye cenciella, ya nun son rentables. El problema añadíu ye la rotura de la economía circular, les perres que gastamos nun reinvierten n’Asturies, nun vuelven, el país emprobez.
Ensin escaecer que onde más llocales presllen ye onde menos población hai, retroalimentando’l procesu que lleva al abandonu de los pueblos: menos xente, menos negociu, presllen tiendes, hai menos servicios, falten productos de primer necesidá, hai menor atractivu pa vivir allí, marcha más xente.
La solución pasa por frayar el círculu viciosu y pa ello hai que plantegar una reorganización de la economía d’Asturies pensada pa beneficiar a los asturianos y non enfotada’n regalar perres a empreses multinacionales, que lluéu abrirán les sos naves, o non, furrularán al cien por cien o al venti, según yos convenga y en xeneral ufrirán al asturianu d’a pie condiciones llaborales menos que dudoses; y nun toi señalando a naide.
This work is licensed under a Creative Commons Attribution 4.0 International License.
