Los productores desixen que’l nome del Gamonéu seya namás l’asturianu, de manera oficial: Nun se pue vender un productu cola so autenticidá como argumentu cuando nin siquier el so nome ye auténticu.

Nun exerciciu de congruencia, el Conseyu Regulador de la Denomación d’Orixen Protexio “Queso Gamonedo/Gamonéu solicitó a la Comisión Européa  eliminar “Gamonedo” como nome del queso y dexar solo “Gamonéu”, nome tradicional del productu, viniente de les llocalidaes de Gamonéu de Cangas y Gamonéu de Onís, cuna del mesmu.

De fechu, va tiempu que’l Conseyu utiliza namás la pallabra asturiana nes sos comunicaciones y medios dixitales, polo que piden que s’actualice’l pliegu de condiciones de la UE que recueye na so redaición de marzu de 2019 les carauterístiques de la so DOP. 

Los cambeos solicitaos incluín más cuestiones, comu la so descripción, aspectos del etiquetáu o de la so ellaboración, ya qu’afirmen que nos actuales pliegos nun s’axusten a la realidá. Por casu, na definición oficial del quesu dase a entender que s’utilicen les tres llechis -cabra, vaca y oveya- na so ellaboración, cuando los quesos gamonéu puen contener llechi de les tres especies, de dos o d’una, dependiendo del casu. Tampocu consideren afayaices les descripciones de les sos carauterístiques sensoriales nin de los sos tamaños.

Finalmente, pidin la inclusión de más races de cabra y oveya, comu la bermeya y la florida, de les primeres o la parda y la parda de montaña de les segundes, siempres dientro’l mesmu troncu xenealóxicu de les actualmente aceptaes.