En casu d’aprobase la nueva llei de la UE para l’aceptación de trexénicos, la filiar de Dupont, Corteva, propietaria del 80 % de les patentes de la simiente de NTG del mundu, van abrir probablemente una fábrica d’hongos xenéticamente modificaos, n’Asturies.

Mañana xueves 18 de xineru a les 13 hores, na entrada que da accesu a la empresa de Dupont y Corteva, va realizase una pequena revindicación pa llamar l’atención contra la nueva llexisllación europea d’Organismos Modificaos Xenéticamente con Nueves Técniques Xenómiques.
Esta acción denuncia la falta d’información, participación y tresparencia no que cinca a les propuestes llexisllatives de la Comisión Europea sobro la regulación de nueves técniques xenómiques na alimentación humano y animal.
La llexisllación propuesta pola Comisión tomaría les plantes cultivaes, pero tamién les monteses y los árboles forestales. D’aprobase, informen los convocantes, la propuesta debilitaría gravemente o esaniciaría dafechu los controles de seguridá y los requisitos d’etiquetáu d’alimentos y piensos producíos a partir d’organismos modificaos xenéticamente (OMG), que la so regulación actual inclúi midíes de seguridá, evaluación de riesgos pa la salú humana y el mediu ambiente, el siguimientu de los posibles efectos adversos dempués de la lliberación nel mediu ambiente y la cadena alimentaria, y l’etiquetáu.
Les partes interesaes del sector agrícola, les organizaciones non gubernamentales de defensa del mediu ambiente y los grupos de presión europeos denunciaron en repitíes ocasiones que les voces crítiques foron sistemáticamente ignoraes na ellaboración de la propuesta, a pesar de que se llindaben a defender intereses xenerales como una alimentación sano, una agricultura vidable y un mediu ambiente sanu.
La probable lliberación a gran escala d’una amplia gama d’especies que comparten una redolada va aumentar la probabilidá d’interacciones ente elles, con efectos cóctel imprevisibles, polo que l’impactu global sobro’l mediu ambiente podría superar los efectos individuales de cada nuevu OMG, con resultaos imprevisibles sobro les cadenes alimentarias y l’ecosistema polo xeneral. Los científicos alvierten de qu’esto podría enchir la capacidá d’adaptación d’unos ecosistemes yá fráxiles pol cambéu climáticu, la contaminación, los pesticides y munchos otros factores.

Alberto Rodríguez

This work is licensed under a Creative Commons Attribution 4.0 International License.