Del alderique surdió la organización d’un grupu de trabayu pa llevar a la práutica los conceutos de soberanía falaos nel mesmu

David M. Rivas fexo un perinteresante percorríu pela hestoria del conceutu de soberanía, entamando pola alimentaria, de la que dixo que yera más fácil va cincuenta años que n’actualidá, seique non imposible, siguiendo pola enerxética, ca vuelta más factible, y finando pola política, imprescindible p’algamar les dos primeres en plenitú. Na charra apurrió dellos exemplos concretos d’esperiencies propies nel ámbetu en delles partes del mundiu y retrucó a toles cuestiones plantegaes polos asistentes. 

Darréu la charra propiamente dicha, garraron el protagonismu la xente del conceyu, aportaos dende delles llocalidaes del mesmu, pa resolver dudes y plantegase les aiciones que pueden dir adoutando en comuña, col marcu qu’apurre la organización Andecha Astur, p’avanzar na xeneración de cadarmes que vaigan permitiendo al so conceyu dir algamando cotes xorrecientes de soberanía.

Les necesidaes básiques non cubiertes en dellos pueblos del conceyu -sanidá, educación, comunicaciones…- y los pilancos que costituin pa plantegase la vida nellos surdieron a lo llargo la conversación posterior, apuntando na direición d’otres cuestiones nes que trabayar y que sedríen facilmente solucinables d’esistir una voluntá real por parte les alministraciones. “Por ello, precisamente, fai falta la soberanía política, pa ser nos les persones de les que depende la solución de los problemes de los nuesos pueblos” resumieron.

Nel Dos Santos

This work is licensed under a Creative Commons Attribution 4.0 International License.