Representantes de 63 entidaes vecinales, sociales y ambientales de too Mieres aconceyaron y alcordaron trabayar pa evitar la quema de basories na térmica de la Pereda.
“Vivir nes proximidaes d’una incineradora de borrafes supón esponese a una forma de contaminación por demás dañible qu’afectaría a la propia salú y a la de la redolada que, ca vegada, más nos cuesta morar”
El primer pasu que van dar va ser informar a la ciudadanía, “paque nun la engañen coles bondaes de quemar borrafes”. De magar ehí la so intención ye movilizar a la xente “pa que sepa que cola salú nun se xuega, que sepa que si se paró la quema de basories n’otros sitios, tamién en Mieres puede parase”.
Los vecinos declararon que van executar toles víes llegales pa que nun se quemen borrafes na térmica y conviden al Conceyu a sumase a esta movilización, “dándo-yos la oportunidá de demostrar que pa ellos lo primero yr la salú de los vecinos”.
La valorización con combustión de basories nun ye una solución, sinón tolo contrario. Ello ye que la producción de Combustible Sólidu Recuperáu (CSR) a partir de borrafes urbanes y asimilables constitúi una soversión de la xerarquía de residuos y el desaprovechamientu d’una gran cantidá de materiales recuperables pervalibles.
Numberosos estudios de siguimientu qu’encaren la problemática sobro la combustión de basories n’estremaes instalaciones (térmiques, cementeres, cerámica, incineradores, etc.) demuestren que la quema ta llueñe de ser inocua. Toles incineradores son fontes de contaminación ambiental, yá que emiten sustances d’elevada tosicidá mientres el procesu de combustión y enfriamientu como metales pesaos (cadmiu, plomu, mercuriu, cromu, cobre, etc.) y compuestos orgánicos, ente los que destaquen les dioxines y furanos. Estos estudios nun dulden en venceyar la esposición a estos compuestos col desendolcu de cáncanos, enfermedaes respiratories o malformaciones y en sorrayar con esmolición el so impactu nos grupos más vulnerables como la reciella.
Poro, animen a los vecinos de Mieres a manifestase contra lo que supon un nuevu ataque a la so calidá de vida.
Alberto Rodríguez
This work is licensed under a Creative Commons Attribution 4.0 International License.
