Esti II Semando Fest aporta’l 9 de febreru a la sala Lata de Zinc d’Uviéu y nelli van participar Sandra Álvarez y Noemí González con un espectáculu qu’axunta poesía feminista y asturianada; Mostru l’Horru, col so rap reivindicativu; Guieldu, banda de folk celta y new age; y Ochobre, formación de punk astur
Falten 10 díes pa que seya’l II Semando Fest y yá ta’l 70% del aforu vendíu. Tres la exitosa edición del añu pasáu -que tamién escosó entraes díes enantes de la so celebración-, vuelve esti festival de música moza n’asturianu qu’entama Musicasturiana.com y Ixuxú Cultura.
Nél van volver a participar cuatro proyectos d’estremaos estilos musicales cola característica en común de que la mayoría de los sos componentes son menores de 34 años y nos que destaca tamién qu’hai una importante presencia femenina, con siete muyeres que van tar enriba l’escenariu. D’esta manera, el festival trabaya tamién por avanzar hacia la igualdá dientro de la música n’asturianu.
Precisamente, la iniciativa va más allá de ser un simple conciertu y por eso tien tou una filosofía que se caracteriza por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
Les entraes tán a la venta a un preciu de 10 € pa menores de 26 años y 12 € preciu estándar, cola posibilidá de mercar por 20 € la entrada col CD Semando Son de regalu.
Alberto Rodríguez
This work is licensed under a Creative Commons Attribution 4.0 International License.
