Endemasiaos homes enfadaos

6 Febreru, 2024

El llunes 15 de xineru espublizóse una encuesta sobro la percepción de la igualdá na población realizada pel Centru d’Investigaciones Sociolóxiques (CIS). Esta encuesta señala qu’hai un 44% d’homes que creen que fuimos endemasiao lloñe con eso de la igualdá, qu’aú vamos dir a parar, qu’agora los discriminaos son ellos.

Pesi a les cifres, les evidencies, la carga femenina nos cuidos, la dificultá de les muyeres pa conciliar vida profesional y familiar, los techos de cristal, les fiendes salariales, los feminicidios, les agresiones sesuales, con too y con ello, hai demasiaos homes que creen que los discriminaos pola meyora de la igualdá, impulsáu pol feminismu, agora son ellos. Creen que se xeneró un desequilibriu a favor de les muyeres, entá peor, en contra de los homes. Da-yos vértigu la meyora y ye normal viniendo d’onde veníamos.

Partimos d’una desproporción enorme onde xuna muyer nin siquier podía abrir una cuenta ensin permisu del home, por casu. El feminismu ve’l camín por percorrer y cunta que les meyores son entá insuficientes, el machismu ve’l camín percorríu y cunta que les meyores son escesives.
Pero esi porcentaxe nun ye neutru (nada lo ye) yá que tien un pronunciáu sesgu políticu: los homes que caltienen que tán siendo perxudicaos poles polítiques d’igualdá son un 86% de los votantes de Vox y nun 66% de votantes del PP. Eses cifres cayen, pero nun desapaecen, pente los votantes del PSOE (22%) y de Sumar (9,5%). La drecha y l’ultraderecha xeneren un discursu antifeminista, fake news incluyíes, que fai que les cifres de cabréu mayúsculu espresaes pola encuesta tean de sobra xustificaes.
El patriarcáu ye un sistema que favorez a los homes y prime a les muyeres, como bien sabemos. Nesti sistema les muyeres nun ostenten el poder, pero sí que pueden tener la potestá de ser les sos guardianes. Dacuando nun son solo el guardianes d’esi poder: delles muyeres pueden tamien ser les sos instigadores y en el defensores de la so pervivencia. Nun hai más qu’oyer a Ayuso opinando sobro esta encuesta: “La so forma de ver la vida propia de malcriaes qu’aspiren a llegar soles y borraches…”.
Con esto queremos dicir que’l machismu nun ye privativu de los homes, que ye un sistema llargamente tresversal y asumíu por homes y muyeres y que, de la mesma que ser blancu nun te convierte en racista, ser home nun te convierte en machista.

Lo que te convierte en machista ye l’asunción y l’esfrute de tou un sistema de privilexos establecíos pol patriarcáu pa los homes, lo que te convierte en machista ye faer campaña pa qu’esi sistema permaneza ad eternum porque ye bonu pa ti. Tamién aquellos qu’a cencielles se dexen acoricar por esti sistema porque, como diz el cantar de Sandro Giacobbe “la vida ye asina, nun la inventé yo” tendríen de faéselo mirar un mizcu.
Pero lo que nos paez más esmolecedor nesta encuesta ye la franxa d’edá qu’espresa esti sentimientu nun mayor porcentaxe: 16-24 años.

Quiciabes-yos dexemos cargar cola sensación de que nacer home equival a ser un opresor, cuando nun ye asina. Nun podemos ignorar nin minusvalorar esi datu porque esi sentimientu ye real y el sentimientu en política espresase’n votos.
Creemos qu’hai ente los mozos un cúmulu d’ansiedá y tracamundiu: la masculinidad tradicional ta en crisis. Yá nun saben cómo ser homes y los discursos que-yos lleguen dende la drecha y ultradrecha déxen-yos una vía fácil y expeditiva: la torna a una identidá masculina ríxida, una vuelta al ranciu patriarcáu onde too ye fácil y cómodo pa ellos.
Nesta encuesta’l 81,2% de les muyeres y el 74,2% de los homes asegura que la igualdá nun se va llograr “nun siendo que los homes tamién lluchen polos drechos de les muyeres”, daqué que nos paez por demás revelador. La igualdá ye una llucha d’homes y muyeres, non de muyeres contra homes.
Quiciabes tenemos d’aceptar que’l feminismu nun xeneró entá un discursu empobináu a los mozos pa dici-yos que ser home nun ye lo mesmo que ser machista. Y ye necesariu porque precisamos aliaos del feminismu, aliaos qu’entiendan que’l feminismu nun favorez a les muyeres y perxudica a los homes, que’l feminismu fainos iguales a toos y fai meyor y más humana la sociedá na que vivimos.