La Plataforma Asturies pola Sanidá Pública anunció que seguirán realizando movilizaciones pa defender na cai un drechu que ye de toos

Miles de persones participaron ayeri en Xixón nuna nueva manifestación, en defensa del accesu universal y la calidá del sistema sanitariu y contra la construcción d’un hospital priváu del Grupu Quirón, convocada por Asturies Pola Sanidá Pública y sofitada por  Andecha Ástur, Asamblea Moza d´Asturies,  Asociación de Pensionistes de Xixón, Coordinadora de Pensionistes, CSI, CNT, CGT, Ecoloxistes n´Aición, Greepeace,  Intersindical, Esquierda Revolucionaria y   Sindicatu d’Estudiantes.

Los manifestantes concentráronse na Plaza l’Humedal  a les siete la tardi, percorriendo les cais del centru de la ciudá hasta la Ca Conceyu, onde representantes de les diverses asociaciones que conformen el colectivu lleeron un comunicáu.

Na intervención los convocantes recordaron que’l drechu a la protección de la salú ta recoyíu comu fundamental na mesma Costitución “Tamos viendo cómo se ta precarizando un derechu fundamental, con retayos n’Atención Primaria, llistes d’espera interminables, etc que va llevar el Sistema Públicu de Salú a un serviciu de beneficencia”.  Destacaron que les interminables llistes d’espera soluciónense dotando de más personal y recursos al sistema públicu y non autorizando a grupos privaos pa que faigan negociu nun sistema alcordáu que terminen pagando tolos ciudadanos.

Denunciaron tamién les polítiques privatizadores de los distintos gobiernos asturianos, que lleven años
apostando polos sistemes mistos públicu/privaos que van escorando escontra l’atención privada, con dineru público. L’adecuación de les plantiyes y el descensu de los ratios, asina comu la meyora de les condiciones llaborales foi otra de les demandes recoyíes nuna llongura manifiesta que nun dexó a naide fora. 

Alberto Rodríguez

.

This work is licensed under a Creative Commons Attribution 4.0 International License.