Majed Dibsi Bulbul, xurista y periodista palestín, representante del Frente Popular pa la Lliberación de Palestina (FPLP)* y vicepresidente de la Xunión de Comunidaes ya Instituciones Palestines n’Europa, defenderá’l drechu a l’autodefensa del pueblu palestín énte los ataques israelies
Andecha Astur entama pa esti vienres 9 de febreru la Escuela de Comerciu de Xixón una charra-alderique baxo l’entítulu “Palestina, el drechu a defendese” na que’l palestín Majed Dibsi Bulbul defenderá’l drechu del so pueblu a defendese pa recuperar los sos drechos inalienables, reconocios pol drechu internacional. “Falamos del drechu a vivir en paz, a tornar a los sos llares y propiedaes, pero tamién a decidir el so futuru, a la llibre determinación, a la independencia y a la soberanía nacionales” declaró recientemente nun artículu el representante del FPLP.
Majed Dibsi Bulbul defenderá esa postura, frente a les llectures simplistes asumies n’Occidente incluso por munchos de los que dicen tar de parte de los palestinos, y que dan a entender que lo que ta pasando en Palestina ye la rempuesta d’Israel a l’acción terrorista de Hamás.
La realidá ye que Palestina vive nun continuu asediu per tierra, mar y aire dende hai más de 18 años y que de magar el 7 d’ochobre asistimos al esterminiu sistemáticu d’un pueblu nun xenocidiu de magnitúes épiques, l’intentu xabaz d’esaniciar a toa una población de la so tierra.
Palestina tien drechu a defendese.
Amás de Majed, intervendrán Llucía Fernández, en representación d’Andecha Astur, y Adrián Tuero, en nome d’Asturies Insumisa, plataforma na que participa Andecha Astur, y que lleva desendolcando delles actuaciones denuncianco el xenocidiu palestín y la collaboración d’empreses con Israel. Darréu les intervenciones, abriráse un alderique nel que Majed Dibsi Bulbul retrucará a toles entrugues de los asistentes.
*El Frente Popular pa la Lliberación de Palestina (FPLP) ye una organización revolucionaria marxista-leninista llaica d’estrema izquierda aniciada en 1967 por George Habash. Ye la segunda organización más grande de la Organización pa la Lliberación de Palestina (OLP), dempués de Fatah.
Nel Dos Santos
This work is licensed under a Creative Commons Attribution 4.0 International License.
