El cuartu estudiu sociollingüísticu espublizáu pola Academia la Llingua Asturiana céntrase n’analizar el conocimientu del asturianu nes tres principales ciudaes d’Asturies

La metodoloxía d’esti trabayu, desendolcáu por Francisco J. Llera Ramo, permite facer comparances sistemátiques colos niveles de conocimientu rexistraos na encuesta del añu 1991. Un últimu bloque, sobre les perceiciones sociales alredor del idioma, facilita’l control de la evolución en dalgunos de los aspeutos clave que, nesti sen, yá recoyeren los tres estudios anteriores.

Con una tirada de namás 300 exemplares y 215 páxines de llargor,”La urbanización del asturianu. Conocimientu del asturianu nos ámbetos urbanos d’Uviéu, Xixón y Avilés” ye’l cuartu de la estaya d’Estudios Sociollingüísticos, que recueyen la fondura, espardimientu ya evolución del conocimientu del asturianu pente la población, siendo una ferramienta perimportante a la hora d’envalorar la situación llingüística actual y, d’haber voluntá política, tomar les correspondientes midies p’aprovechar fortaleces ya iguar febleces. 

Alberto Rodríguez

This work is licensed under a Creative Commons Attribution 4.0 International License.