Un añu más, la Secretaría de la Muyer de SUATEA presenta la nueva edición del calendariu coeducativu Tiempu de Muyeres, Muyeres nel tiempu, nesta ocasión, dedicáu a muyeres arquiteutes ya inxenieres civiles
Dende la Organización de Muyeres de la Confederación Intersindical lleven venti años ellaborando un calendariu feminista y coeducativo, col que visibilizamos les aportaciones de les muyeres a la sociedá dende estremaos ámbetos. Esti añu preséntase un calendariu cientráu en muyeres arquiteutes ya inxenieres.
Pa esti actu de presentación vamos cuntar cola participación d’Ana Peral Guilabert, arquiteuta, docente y collaboradora d’Inxeniería Ensin Fronteres. Con ella, vamos ver la contribución de les muyeres a les distintes árees que, mes a mes, apaecen nel calendariu: paisaxismu, urbanismu, espacios públicos, edificios singulares, viviendes sociales, rehabilitación, diseñu, interiorismu, tresporte, carreteres
y ferrocarriles, pontes y canales y puertos.
Los 365 díes del añu contienen efemérides alusives a arquiteutes ya inxenieres, pero tamién
a aquelles otres muyeres que fueron apaeciendo n’ediciones anteriores: escritores, músiques, científiques, aventureres y esploradores, artistes plástiques, trabayadores del cine, esportistes, científiques, creadores d’opinión, de cambeos sociales, ceadores de pensamientu, y tamién feches señalaes nes lluches feministes. Como recursu didácticu que ye, a la fin del calendariu hai una propuesta d’actividaes pa tolos niveles educativos y pa ca un de los meses del añu.
L’actu de presentación del calendariu, va tener llugar esti xueves, 8 de febreru, a les 18:00 hores, n’ Antigua Escuela de Comerciu de Xixón. Puedes descargar el calendariu nesti enllaz.
Susana Sela
This work is licensed under a Creative Commons Attribution 4.0 International License.
