El desencadenante d’estes movilizaciones son les que se tán produciendo por toa Europa, pero’l so fondu ye más ampliu.
La ganadería asturiana lleva enforma tiempu reclamando l’atención del gobiernu asturianu y esti restrucando en tou momentu unviando a les sos fuerces represives pa frenalos. Eso fixeron tamién nesta ocasión, torgando a los manifestantes averase siquier a la sede de la Presidencia del Principáu con antidisturbios. Les porres volvieron atopase coles vares ya incluso colos tractores al pie de les llecheres; l’aumentu de la tensión llevó a que la tractorada, protagonizada por más de 200 vehículos agrícoles y convocada primeramente hasta los dos de la tarde d’ayeri, s’allargare -a lo menos- fasta la mañana de güei.
A estes hores, el tráficu n’Uviéu sigue atayáu polos tractores aparcaos na cai Uría y Marqués de Santa Cruz por unos llabradores y ganaderos que, cenciellamente, nun pueden más. A la crisis europea del sector súmase l’abandonu al que lleven sometíos va décades per parte del gobiernu asturianu, la burocracia incaltenible, los baxos precios de compra, la soledá na so llucha contra los ataques de los llobos, la desatención de les zones rurales, l’impagu de les PAC, les deficientes comunicaciones nes zones rurales, la priorización de les necesidaes del turismu frente a les de los habitantes y tantos otros problemes que llastren el campu asturianu.
Los manifestantes menacien con nun movese hasta la xunta comprometida pol conseyeru de Mediu Rural, Marcelino Marcos Líndez, colos representantes de les organizaciones URA y USAGA, convocantes d’esta movilización. El presidente del Gobiernu asturianu, pela so parte, prefirió axuntase ayeri colos sos sindicatos allegaos (UXT y CCOO) y cola Federación Asturiana d’Empresarios (FADE).
Nel Dos Santos
This work is licensed under a Creative Commons Attribution 4.0 International License.
