Falta comida, papel hixénicu, sábanes y toballes, material de llimpieza… denuncien la «situación de precariedad» del Centro Residencial de Cabueñes.
El desdexamientu de los servicios públicos d’atención abre les puertes a la privatización de los mesmos.
El Centru Residencial y d’Atención Integral a Persones con Discapacidá de Cabueñes alcuéntrase n’estáu d’abandonu per parte de la Conseyería de Drechos Sociales y Bienestar, un abandonu que ta llegando a estremos inasumibles, denuncien quienes trabayen ellí. La nefasta xestión d’esti serviciu públicu llevó al centru de la precariedá que denunciaben va un añu a la más absoluta escasez.
Nun hai aceite, carne, fariña, pexe fresco, galletes, pan de molde nin papiella para pacientes que la precisen. Nun pueden siguise les instrucciones dietétiques daes polos mélicos, porque, a cencielles, nun hai ingredientes. Los cocineros aprovechen como pueden les esistencies que queden nel almacén, pero nun van durar muncho más. L’impagu a los proveedres ye una de les causes d’esti desabastecimientu y les escases entregues de les nueves llicitaciones acabantes de roblar traen productos escasos y de peor calidá.
Pero l’alimentación nun ye l’únicu problema. Nun hai abondo papel hixénicu nin servilletes, nun hai ensuchadores nin baberos, nun hai guantes y va un añu que nun se recibe la correspondiente renovación de menaxe y llencería.
La situación ye conocía na Conseyería dende entamos del 2023, pero llueñe de solucionase foi agravándose y la calidá asistencial ta viéndose seriamente afectada. Poro, el comité d’empresa convocó una asamblea xeneral de trabayadores pal prósimu xueves, 15 de febreru a les 14.15 hores, nun refugando l’entamu de movilizaciones.
Susana Sela
This work is licensed under a Creative Commons Attribution 4.0 International License.
