La capital del conceyu va acoyer diferentes actividaes en defensa del idioma ente’l 19 y 23 d’esti mes

Mieres va allugar ente’l 19 y 23 de febreru la Xira pola Oficialidá. La campaña entamada a comuña ente Iniciativa pol Asturianu y la Fundación Almastur presenta un diversu programa d’actividaes alrodiu de la llingua asturiana. Les esposiciones y los actos van desendolcase na Casa de Cultura ‘Teodoro Cuesta’ na capital del conceyu.

L’arrancadera va tener llugar el llunes 19, a les 19:30 hores, cola inauguración de la esposición ‘Voces, una hestoria de la llingua asturiana’ y la esposición bibliográfica, amás de la presentación de la campaña nel conceyu. Darréu, va proyectase’l documental ‘De güeles a nietes’, una producción d’Iniciativa pol Asturianu y Cuatro Gotes qu’afonda sobre la tresmisión xeneracional del asturianu.

La segunda xornada, el martes 20, el fundador d’Iniciativa pol Asturianu y miembru de númberu de l’Academia de la Llingua Asturiana, Inaciu Galán, va dar una charra-coloquiu baxo’l títulu ‘¿Por qué sí a la oficialidá del asturianu?’ a les 19:30 hores. Al traviés d’esti actu, les organizaciones pretenden tresmitir la importancia de la oficialidá y resolver duldes de los asistentes en cuanto a la so declaración.

A la mesma hora, el miércoles 21 de febreru, Día Internacional de la Llingua Materna, va tener llugar un taller de creación lliteraria baxo la dirección de Raúl Alonso, ganador del Premiu Asturies Xoven de Poesía. Alonso ye Hestoriador pola Universidá d’Uviéu y comunicador pola Universidá de Valladolid. Amás, tien nes llibreríes el so primer poemariu, “Los Días vividos” (Ed. Camelot, 2019) y collabora cola revista Formientu. La finalidá d’esta actividá ye estimular la creación lliteraria n’asturianu entroncando cola conmemoración d’esta xornada internacional de defensa de les llingües maternes.

El xueves 22 de febreru, a les 19:30 hores, Xosé Ramón Iglesias Cueva, académicu de númberu de l’Academia de la Llingua Asturiana y secretariu de la mesma, va faer un repás a la historia de la lliteratura n’asturianu y va presentar al elencu d’escritores del conceyu mierense con una charra baxo’l títulu ‘Escritores de Mieres na lliteratura asturiana’.

La Xira pola Oficialidá en Mieres va concluyir el vienres 23 de febreru con un actu reivindicativu que va entamar a les 19:30 hores; aniciando con una apertura musical a cargu de la cantante de tonada, Liliana Castañón. De siguío, va tener llugar un recital poéticu cola participación de Lourdes Álvarez, Premiu Nacional de Lliteratura, y col escritor del conceyu Xuan Santori. Pa finar l’actu, va facese llectura del manifiestu pola oficialidá.

Susana Sela

This work is licensed under a Creative Commons Attribution 4.0 International License.